英超雙雀足總盃插翼難飛

猪拉多纳

「英超雙雀」輸到慌，英格蘭足總盃作客「英冠仔」，分分鐘飛唔起！「喜鵲」紐卡素、「金絲雀」諾域治近期戰績曳到震，前者有猛將離隊、後者慘遇傷兵潮，今輪分別造訪白禮頓同彼德堡，盲目信名牌的話，隨時令你輸到懵！
諾域治決堤大難臨頭

諾域治近期走勢曳到震，魔法全面失靈，同傷兵太多有關。大將史提芬摩利臣、舒文、韋達卡都缺陣，而門將魯迪倦勤，更令防守力大大減弱，幸隊長格蘭荷特可以復出，作客「神經刀」彼德堡有機演入球騷，捧大！

（now 632周六晚11時直播）

諾域治不嬲限米煮限飯，早前砌低曼聯令人拍爛手掌，但近四仗全部輸晒，睇到「金絲雀」的確唔夠人用。後防穿窿係致命傷，呢四場共失九球，球隊決堤情況嚴重，今場國腳級門將魯迪出唔到就更加令人擔心。不過前鋒格蘭荷特傷愈可復出，有助穩定軍心，要入波唔難。
彼德堡近5仗轟14球

彼德堡於快車期表現一流，近五戰贏四場，一共轟入十四球連開五口大，呢班波順開入波就滾滾來。今輪遇強冇心理壓力下有利發揮，捧大盤！
紐卡素殘陣咪落疊

紐卡素賣走丹巴巴亞，而且卡比耶、賓艾化等主力依然因傷缺陣，連隊長高洛仙尼都有離心，「喜鵲」內部亂晒大龍，作客難勝。白禮頓上屆足總盃曾淘汰紐記，今次有晒經驗唔赦對手，平手盤捧主隊！（now 633及660周六晚8時30分直播）
白禮頓上屆小勝一粒

紐卡素傷兵名單水蛇春咁長，約拿斯古迪利斯、丹尼森遜、賴恩泰萊等同樣唔出得，雖然羅致咗法國右後衞迪保治，但近七戰一勝六負，就算面對低級對手都難言穩勝。領隊柏杜手上冇乜兵可以用，為免再有球員受傷，預料今仗都會用唔少新人，白禮頓係硬嘢，「喜鵲」毫無贏波把握。

白禮頓好硬淨，上屆第4圈賽事就贏過紐記1比0，相信會續用嚴密防守、緊身攔截「打鵲」，加上射手馬卡爾史密夫狀態冒升，平手盤坐和望贏。