紅魔「立立令」勢炒西布朗

猪拉多纳

曼聯主場對西布朗，紅魔上仗驚濤駭浪下險勝紐卡素，領隊費格遜於場邊食盡驚風散，相信佢老人家已經省到班手下立立令，加上今仗係紅魔2012年最後一場，對住「私房菜」西布朗，眾將都想在奧脫福fans面前清脆贏番場，西布朗唔使旨意偷雞搶分，紅魔「讓球主勝」捧得過。

（有線300及200台周六晚11時直播）
明夏2.2億買羅拔仔好事近

曼聯於聖誕新年快車頭兩站得一勝一和，藉此拋離曼城七分，但演出麻麻，上仗臨尾先反勝紐卡素4比3，睇到費爵爺心驚膽戰，相信賽後佢把「風筒」實吹到班紅魔醒晒，眾將必醒醒定定踢番場好波氹吓老人家，在2012年最後一戰畫上完美句號。賽前英媒更言之鑿鑿，話紅魔同多蒙特箭頭羅拔利雲度夫斯基達成協議，據報羅拔仔明夏會以1,800萬鎊（約2.2億港元）轉會費加盟，並簽署一份8萬鎊（約100萬港元）周薪的五年合約，令前線爭位情況更加激烈，尹佩斯、查維亞靴南迪斯、韋碧克等鋒將一定趁朗尼因傷缺陣爭取表現，對住近五次作客奧脫福輸足四場、輸親都兩球或以上嘅西布朗，可以入多啲波啦！