史篤城拿「守」拆禮物

猪拉多纳

今日係Boxing Day，斯維搞搞新意思同大家傾吓英超波，其中史篤城一向硬淨到暈，今晚主場迎戰利物浦，以該隊近四次主場聯賽對紅軍未輸過嘅賽績睇，擺明係格食格，連過氣金童奧雲都揚言要射垮母會，咁大口氣，兼且有得受讓咁筍，史篤城「讓球主勝」非捧不可。

（有線300及200台周四凌晨3時45分直播）
主場四戰紅軍保不敗

史篤城係英超一支難纏嘅爛頭卒，由於領隊佩尼斯注重防守，後防有梳爾哥斯、賀夫、厄遜幾支大杉撐住，中場工兵如柏拉西奧斯、尼桑斯、韋赫特、格連韋倫全屬死纏爛打之輩，令史軍硬淨唔易輸，今季聯賽只係輸過三場咁大把，主場八戰更加未嘗一敗，足證呢支鐵軍嘅厲害。而過往倒戈紅軍未試過入波嘅奧雲，都希望今仗實現零的突破取得士哥。況且利物浦表現時好時壞，尤其聯賽作客只係贏得兩場，而史篤城自08年升上英超後，四次聯賽主場遇紅軍兩勝兩和，今仗仍然有得受讓實在非常好路，續撐史軍「讓球主勝」。