飛腳踢散櫻花氹粉絲

猪拉多纳

天皇盃8強爆「大阪打吡戰」

天皇盃「大阪打吡戰」今日上演，大阪櫻花喺8強遇上大阪飛腳，受讓咪以為有着數，因為櫻花護級成功後已提早放聖誕假，連教練古爾比都話因為家事返咗巴西，相反飛腳降班後仲未散，仲話要爭天皇盃冠軍，進軍下屆亞冠盃向球迷謝罪，1.9倍客W抵撐。

（開賽時間：周日中午12:00）
櫻花主帥返巴西放假

今場波喺大阪長居陸上競技場進行，櫻花收咧前6場聯賽得4和2負，直至上圈以4:0淘汰清水心跳先叫做止血回升，但其實教練古爾比、中場森比斯奧及門將金鎮鉉以家事做藉口，分別返到所屬國家過聖誕，呢場要由助教小菊昭雄繼續帶隊，睇得出佢哋完全冇心爭天皇盃，而且中場吉野峻光同後衞藤本康太未好番，即使射手柿谷曜一朗復出披甲都信唔過。

另方面，飛腳連盃賽近13戰其實有6勝5和2負，只不過發力太遲搞到要降班，但佢哋宣布唔留用教練松波正信後，經已請到原本執教清水心跳嘅長谷川健太下季領軍，有助穩住軍心，而且陣中兩位日本國腳，包括中場遠藤保仁同後衞今野泰幸好大機會捱義氣留隊，上圈飛腳以3:2打沉町田澤維亞，遠藤保仁更射入招牌罰球，今鋪對住死對頭櫻花隨時又發威。
天皇盃賽制：

今輪為8強賽事，若90分鐘打和，將加時30分鐘決勝，再和則互射12碼分勝負。