紅軍飄忽大好過Ｗ

猪拉多纳

今晚英超尾場利物浦主場對富咸，利物浦近年變成「神經刀」，當認為佢哋會贏時，往往就失分，但睇淡佢哋時，卻有超水準發揮，實在好難捉摸。不過「紅軍」勝在有蘇亞雷斯，入波能力唔錯。富咸屬於「大盤王」，可以考慮入球大。

（有線300及200台周日凌晨1時30分直播）

今時今日利物浦喺英超，無論對任何球隊，都難令人有十足信心佢哋可以贏波，皆因「紅軍」水準太過飄忽，能夠打和曼城、車路士，但卻輸畀下游阿士東維拉。因此利物浦今仗對富咸，度士擔心佢哋又失拖，主Ｗ1.4倍可以話係高風險低回報。不過利物浦鋒線質素佳，淨係一個蘇亞雷斯都足以翻轉對手防線，小將史達寧竄擾力強，加上謝拉特後上射門，「紅軍」入波機會甚高。
富咸遇名牌豁出去

富咸今季遇名牌球隊，踢得特別醒神，無懼對手名氣，豁出去鬥攻，作客2比3不敵曼聯，以及打和阿仙奴3比3，都係富咸代表作。數據上富咸今季聯賽開大比率達到82%，同曼聯並列開大次數最多嘅球隊。雙方勝算唔高情況下，入球大屬於唔錯選擇。