阿仙奴曼城撳掣救帥

猪拉多纳

雲格文仙尼隨時「聖誕快落」

英超快車期今晚正式展開，列強要喺十一日內四戰，稍有差池分分鐘影響整季戰績，多間球會教頭帥位不穩，兩位名帥曼城文仙尼及阿仙奴雲格依家好似玩緊跳樓機咁，隨時跌落去，呢次聖誕快車少啲心血都頂唔順呀！
阿仙奴射爆韋根咕窿

韋根主場對阿仙奴，兵工廠上場大勝雷丁踢出今季最悅目一戰，教頭雲格搵禾確特擔正打前鋒效果理想，進攻速度極高，適逢今次韋根後防中路穿窿，客軍可望乘勢喺今季聯賽首次作客兩連勝，捧客Ｗ！

（有線300及200台周六晚8時45分直播）

阿仙奴失去尹佩斯後要重新調整前線布陣，雲格先後起用謝雲奴、基奧特及普多斯基等擔正攻堅，踢落唔算好得。禾確特扭計要踢前鋒先諗續約，雲帥順佢意，上場對雷丁畀佢試打前鋒，禾仔同普多斯基及阿歷士張伯倫組成三叉戟，成功提高球隊進攻速度，帶生埋中場辛迪卡索拉，結果大炒雷丁5比2，取得兩個幾月來首場聯賽作客勝仗，總算暫時為雲格減壓。
韋根多傷兵中路穿窿

韋根喺主場踢落向來唔曳，衰在近期受到嚴重傷兵問題困擾，後防中路更成重災區，艾卡拉斯、卡達維及拉米斯先後受傷，本來仲有個比斯古頂住，點知佢都傷埋，依家中路呈真空狀態，若然一眾傷兵未能趕及復出，隨時要搵中場大衞鍾斯客串頂檔，呢位哥仔頂又唔頂得，速度又唔高，對住兵工廠班弗到震嘅進攻球員想唔失波都幾難！

阿仙奴今季聯賽作客九戰只贏三場，單睇賽績確實唔多開胃，但佢哋班球星已經打起信心，有機會重演上季作客4比0大炒韋根一幕，熱捧客勝！