皇馬半場捱「細」界

猪拉多纳

冬假大縮水 艦員嬲莫帥

是非多多嘅皇家馬德里教頭莫連奴，由於決定縮減球員嘅歇冬假期，惹來眾將不滿，今晚「銀河艦隊」出戰主場特醒嘅華拉度列唔易踢，軍心不穩下，隨時受制於對方嘅密集防守，斯維認為「半場細」值得再追。

（now 632周日凌晨3時直播）

其實皇馬今場以一波三連勝姿態出征，已經一洗之前頹風，王牌C朗亦重拾射門鞋，點知教練莫連奴好衰唔衰，突然決定只係畀球員6日歇冬假期，命令佢哋12月29日歸隊操練，同上年有10日假期差天共地，難怪球員詐型喇，特別係南美球員如希古恩、馬些路、迪馬利亞等，淨係搭飛機一來一回都用咗兩日喇，好似冇放過。莫帥咁搞法，眾將仲邊有心機同你賣命呀？

講番場波，皇馬今季作客破密集嘅板斧唔多，面對一心死守嘅主隊，尤其係比賽初段，經常出現老鼠拉龜嘅情況，淨係睇佢哋7場作客聯賽，就有5場開半場細。
華拉死守吼埋半場和

對手華拉度列則有自知之明，今季升班後以穩字行頭，令該隊至今只失15球，位列防守榜第4位，而喺16場正式賽事中，便有11仗半場總入球少過兩粒，證明華軍喺初段嘅體力化壓迫分外奏效，加上佢哋主場只曾一敗，夠韌力同皇馬周旋，今仗「半場細」有1.65倍咪嫌少，而2.7倍嘅「半場和」亦值得留意。