西布朗作客「大」無畏

猪拉多纳

阿仙奴近況曳 熱W唔值博

英超傳統勁旅阿仙奴目前在聯賽15戰21分，錄得18年來最曳戰績，「廠粉」終於憤怒了，就連神級教頭雲格都被柴台，「兵工廠」今晚主場鬥西布朗不容再失，決心夠，但4戰不勝後個W都係1.5倍樓下，認真唔值博！阿仙奴求反彈必狂攻，而對手西布朗反擊快狠準，兩隊鬥攻，推介大盤！

（有線300及200台周六晚11時直播）
4場不勝急求交代

阿仙奴上輪主場不敵史雲斯，令雲格民望跌至新低點，有「廠粉」甚至忍唔住高呼「雲格下台」。經過7季零冠，阿仙奴今季仲喺聯賽創出18年來最差開季戰績，「廠粉」耐性耗盡群起上街示威，其後會方急急宣布再借用傳奇球星亨利，明顯係想平息民憤，但亨利要等到1月先至返到嚟幫手，正一係遠水難救近火。

「兵工廠」現時主要傷兵包括箭頭禾確特、普多斯基、中場戴亞比、守將沙格拿及哥斯尼，人腳唔齊，但仲未衰到無兵可用嘅地步。大軍今季靠晒西班牙發電機辛迪卡索拉策動攻勢，此子經過頻密征戰疲態盡現，好彩上場歐聯休戰抖夠後，今場聯同基奧特、韋舒亞等主將復任正選，預期球隊攻力可稍為改善。
近4次碰頭全開大

西布朗本來只屬中游分子，今季由奇勒執教全面升呢，仲特別擅長打老虎，先後於主場砌低車路士同愛華頓，無論主場作客都能以高效快速反擊威脅對手後防，大軍兩連敗後亦決心打場爭氣波。

阿仙奴近期4戰不勝，單計聯賽3場冇贏波，連場劣績未必換來理想賠率，主W冇肉食唔抵玩，翻查往績，兩軍近4次交手全開大，睇嚟捧大係更佳選擇。