紅軍客爆烏甸

猪拉多纳

贏先肯定出線 生牯仔爭表現

歐霸盃嚟到最後一輪分組賽，A組形勢七國咁亂！今晚造訪烏甸尼斯嘅利物浦贏波先肯定出線，雖然唔預「紅軍」會精銳盡出，但下場聯賽停賽嘅蘇亞雷斯大有機會踢足全場，加埋勁有火嘅後生仔，面對已經出局嘅烏甸，要贏波唔難，敲1.78倍客W！

（有線61及201周五凌晨2:00直播）

歐霸盃向來都係爆冷溫床，即使利物浦仲算得上係名牌球隊，上場分組賽遇上年青人仍然慘遭滑鐵盧，如果佢哋今場輸波，更可能會跌落第3甚至榜尾出局，相反贏波嘅話，就有機會首名出線，對數學麻麻哋嘅小妹嚟講，都咪話唔難計！「紅軍」喺聯賽已經冇貨派，喺歐霸盃面臨生死關頭，領隊羅渣士相信唔敢叫班球員hea踢，特別係蘇亞雷斯喺周末對韋斯咸場英超要停賽，今場唔踢都唔啱數啦，有佢喺度入球應有一定保證吖！
蘇索自爆進步因食意粉

利物浦今季戰績麻麻，但班青年軍升上一隊後愈踢愈好，講真吖，小妹覺得班後生仔踢落勁有火，值得有正選o架！得19歲嘅進攻中場蘇索，講到創造力陣中幾乎無人能及，佢除咗喪谷胸肌嚟加強身體對抗外，仲自爆進步神速嘅秘密：「練完波之後就要食意粉！」至於膽識搭夠嘅中場舒維爾亦有啲謝拉特後生時嘅影子，20歲嘅佢亦講明以「神奇隊長」為學習對象，為爭正選就算踢左閘都在所不計！「小紅軍」咁有火，又邊係已出局、視今場為例行公事嘅烏甸尼斯可比先？
烏甸包尾出局隨時hea踢

排榜尾鐵定出局嘅烏甸尼斯唔止鬥心成疑，近況都麻麻，佢哋上仗喺意甲以4:1大炒卡利亞里之前，曾經連續7場不勝，況且今仗仲有中場韋利安斯杜明高斯停賽，中場未必夠搶，前鋒迪拿達利之前6場入7球威過一陣，近排又突然靜咗落嚟，即使想喺主場攞番個彩，睇怕都有心無力。
烏甸分組賽3連敗

‧利物浦24次於歐洲賽對意大利球隊，得8勝5和11負。

‧烏甸今屆歐霸盃分組賽3連敗，亦係首次於歐洲足協盃及歐霸盃分組賽出局。

‧利物浦只要贏波就晉級，和波嘅話則要年青人未能取勝才能出線。

歐霸盃A組