紅軍大咬烏甸

猪拉多纳

哨牙蘇瞓身博出線

今晚上演歐霸盃最後一輪分組賽，A組生死戰，紅軍大得起烏甸！利物浦作客烏甸尼斯，贏就肯定出線，輸就鐵定出局，雖然形勢緊湊，謝拉特、連拿等正選亦冇隨隊出征，但仍有蘇亞雷斯撐起鋒線。烏甸無欲無求必對攻，雙方後防都穿窿，捧大啱數！

（有線61及201台周五凌晨2時直播）

此組形勢微妙，安治10分排榜首已出線，烏甸4分已出局，利物浦同年青人各得7分，邊隊晉級仍屬未知數。若紅軍贏波，唔使理年青人乜賽果，都肯定出線；但如果輸波，就算年青人都輸埋，紅軍都必定拜拜。而若利、年兩軍齊齊和波，就紅軍晉級。

年青人對安治有主場之利，而後者已經出線，所以年青人贏波唔奇，故利物浦最穩陣都係贏波。不過利物浦今仗18人陣容中，除冇隊長謝拉特同連拿外，祖阿倫、紐尼沙軒、史卡迪爾、丹尼爾艾格、史達寧、格連莊臣都冇去到，若非「哨牙蘇」嚟緊英超鬥韋斯咸須停賽，今仗都唔會預佢。領隊羅渣士明顯對出線唔肉緊，唔係點會續排法拿根、加歷查、高亞迪斯同積羅賓遜四人防線？呢個組合質素、經驗都唔夠，面對烏甸猛攻，想唔失波都幾難。如果失波先，利物浦為反勝必喪攻，有利開出大盤。
烏甸場場有失

烏甸雖然已出局，但對手假假哋都係利物浦，有主場之利都想好好睇睇，贏番場出局攞尾彩。烏甸今仗雖應會收起部分主力，但始終喺自己地頭出戰，唔使輪換得咁緊要，故實力仍在。烏甸攻強守弱，近10仗場場失波，近6仗仲失13球，面對「哨牙蘇」咪話唔震！