意盃前菜卡利亞里開餐

猪拉多纳

收費台今季失落意甲轉播權，近期改播意大利盃作補償，上周已經率先送上費倫天拿對祖雲史達比亞嘅第3圈賽事，可惜撞正連場英超快車，相信都冇乜人留意到，今晚就有得睇卡利亞里主場對佩斯卡拉嘅純意甲對碰，戲碼雖然都係麻麻哋，但至少可以作為歐聯開波前嘅前菜。
佩斯卡拉講明出副選

睇近績，兩隊都係累鬥累，卡利亞里上場就失4球，連續5場聯賽不勝，佩斯卡拉剛戰就失5球，近6戰更輸足5場，不過主W都熱到1.52倍，似乎唔多睇好佩斯卡拉喎，無他嘅，佢哋教練貝高迪已經講明今仗會出副選，留力應付周日聯賽對熱拿亞嘅聯賽榜尾大戰。

卡利亞里近績雖然麻麻，但近仗對手拿玻里、國際米蘭同費倫天拿都係硬嘢，贏唔到係可以理解，更好嘅消息係今季都有波入嘅中場迪辛拿及艾卡度，因為嚟緊場聯賽都要坐波監嘅關係，今場意盃都會被安排打正選，陣容有保證，不妨直取2.57倍「讓球主勝」。

（now633台周四凌晨1:30直播）
足球重心：卡利亞里（讓球主勝）、車路士（半場大）

馬膽推介：8場(11)喜競寶寶

海外二級賽季軍來港兩季終於適應水土，上仗蹄下敗將「首飾孖寶」再出即補中，就知上仗贏馬水準唔低，可望繼續反彈。
意盃賽制

今輪為第4圈，以一場過分勝負，若法定時間內打成平手，則需加時作賽，再和就互射12碼決勝。