薩克達 祖記握手言「和」

猪拉多纳

默契波齊出線？主力缺陣側側膊

歐聯分組賽默契波再現？薩克達今晚喺E組主場對祖雲達斯，足智彩熱爆和波1.85倍值得跟！今場打和嘅話，兩隊就攜手出線，加上雙方各有主力停賽，祖記又剛啱收完三星大筆贊助費，冒唔起出局風險，「和」氣生財博得過！

（有線63及203、中央5台周四凌晨3:45直播）
薩克達射手阿祖安奴停賽

現時薩克達有10分提早出線、祖記有9分形勢大好，只要今場打和，就肯定可以壓倒得7分嘅車路士攜手躋身16強，足智彩開和波得1.85倍，當然係考慮到默契波因素。除此之外，呢場薩克達有「無品射手」雷斯阿祖安奴停賽，前線火力大打折扣，睇怕都係莊家覺得佢哋唔夠本錢開W嘅原因，要打爆一向硬淨嘅祖記唔容易！
祖記有新贊助求穩陣出線

當然，其實祖記全取3分，就可以壓過薩克達首名出線，但唔好忘記，祖記喺歐洲賽作客表現普通，對上5場歐洲賽作客全部打和，而且最近佢哋搵到三星加入贊助商行列，只要喺歐聯穩陣出線，肯定會喺冬季市場大把錢使，與其冒險同薩克達駁火，不如穩陣打和向贊助商交代好過。

事實上，祖記計劃硬撬利物浦射手蘇亞雷斯，又周圍放風話要簽前鋒，假如能夠喺歐聯分組賽出線，嗌高層開水喉嘅本錢就強得多。更何況，祖記今場有中場馬治斯奧停賽，作為主力嘅中場維達爾同後衞基亞連尼又未好番晒，睇怕唔會紮住上陣，跟大隊玩和波最合理。

歐聯E組
祖記連開4場半場細

‧薩克達連續16場主場不敗。

‧薩克達教練盧捷斯古過去喺意甲9次領軍對祖雲達斯得1勝4和4負。

‧祖記51次射門唔中目標為分組賽中最多。

‧斑馬兵團連續4場開半場入球細。
刀仔鋸大樹博「主和」、「客和」

雖然薩克達教練盧捷斯古話唔會同祖記踢默契波，但佢個心點諗真係好難講，更何況佢曾經長時間喺意甲執教，熟悉行情，唔排除同祖記高層有偈傾。假如大家覺得今場和味濃，1.85倍和波又唔夠肉食，咁就不妨刀仔鋸大樹玩10倍「主和」或「客和」，至少值博率高啲。