鋤強扶弱拉低歐聯可觀性

猪拉多纳

歐洲足協會長柏天尼近年積極進行「鋤強扶弱」政策，令足球小國球會可以參與歐聯分組賽。不過，呢類第三勢力始終礙於質素有限，往往難以突圍，令出線形勢早成定局。歐聯以金錢掛帥，如果呢種情況持續，令賽事可觀性下降，相信賽會將來亦可能會踢走欠競爭力嘅球隊。

今屆歐聯都說明，球隊唔需要每場都去盡搶分，只要夠分出線已足夠，投X者更加要小心。慶幸E組最後一輪分組賽仲有睇頭，上屆冠軍車路士要出線，除咗必須擊敗洛斯查蘭特之外，仲要寄望薩克達贏祖雲達斯。
車仔出線還看阿布「發功」

因此，關鍵在於薩克達肯唔肯幫手，呢方面就要睇車仔班主阿布拉莫域可唔可以發揮自己喺東歐嘅影響力，「激勵」呢支烏克蘭勁旅全力爭勝。薩克達到底會否賣佢帳，亦屬懸念，令比賽更耐人尋味。

車路士七個月前憑「901」陣式，奇迹殺入決賽，再憑互射十二碼擊敗拜仁慕尼黑捧盃，但依家卻處於分組賽出局邊緣，又有幾多人估得到呢？呢種正係足球引人入勝之處。