聖日耳門誓贏「波」做「一哥」

猪拉多纳

歐聯分組賽一連兩晚上演煞科戰，今日出場嘅A至D組，出線名單已經出爐，只係首名仲有得爭。A組方面，巴黎聖日耳門同波圖都已經齊齊出線，但聖日耳門就落後1分，佢哋唔單止想贏波做小組「一哥」，更重要係展示出稱霸歐洲嘅決心，今場一於捧1.92倍主勝。

（有線62、202及中央5台周三凌晨3:45直播）

聖日耳門射手伊巴謙莫域近期紅到發紫，之前喺國際賽以一記超級倒掛射爆英格蘭，日前又語出豪言話：「巴黎聖日耳門3年內必捧歐聯！」雖然呢位瑞典射手不嬲都語出驚人，但以聖日耳門嘅財力同雄心，小弟亦都唔敢懷疑佢哋做唔到，因為佢哋個教練安察洛堤曾經兩度稱霸歐聯。
波圖求和決心輸蝕

仲有大家唔好忘記聖日耳門喺一月可以大事增兵，到時就絕對有能力挑戰豪門，不過依家就要先喺歐聯爭取印象分，以首名出線打好個底，之後就更加有牙力請到好手加盟。對手波圖今季賣走侯克等主力後，仍然保持強勁戰力，的確值得一讚，不過今場作客隨時諗住和波算數，鬥心唔及對手，捧主隊有着數。

歐聯A組
頂占筍盤：巴黎聖日耳門（主勝）