皇馬立立亂照炒阿積士

猪拉多纳

《馬卡報》爆寸王季尾解約

皇馬今晚主場出戰D組最後一輪分組賽，雖然C朗同莫連奴呢對葡萄牙將帥，喺皇馬嘅生涯睇嚟步入最後階段，不過對住首循環作客都大炒嘅阿積士，兩人一定繼馬德里打吡後做多場好戲，1.78倍「讓主」要捧！

（有線63及203周三凌晨3:45直播）
銀河艦隊3主將缺陣

皇馬近日新聞多多，唔單止C朗扭計唔成畀會長皮里茲叫佢要走就隨便，等佢有錢買美斯喎，《馬卡報》尋日亦大字標題報道，皮里茲決定同公然挑釁擁躉嘅莫連奴喺季尾解約，雖然「寸王」尋晚循例否認，法國嗰邊就爆佢同哥迪奧拿都係聖日耳門目標人選。不過今晚皇馬就算有艾比路亞坐波監，沙比阿朗素同沙治奧拉莫斯為咗洗底免攞黃牌，肯定唔會落場，但對住作客都大炒四個一皮嘅阿積士，呢對葡萄牙將帥實行繼續發威，做多場好戲畀班球迷睇。

至於肯定出線無望、只有爭歐霸盃入場券嘅阿積士並冇為今場波留力，啱啱喺荷甲出戰燕豪芬，中場保臣、基斯甸艾歷臣同後防摩辛達等主力悉數上陣，預期今場會沿用相同陣容。不過賴恩巴布受傷缺陣就令阿積士鋒力削弱，作客嚟到巴拿貝隨時又畀皇馬大屠殺。