歐聯壓軸章 曼城蒙查查博「細」

猪拉多纳

留力打吡兩頭唔到岸

死亡D組由多蒙特及皇家馬德里携手出線，但歐霸席位懸而未決，曼城同阿積士仲有得爭！曼城主帥文仙尼話球隊視歐霸盃為目標，但嚟緊英超有「曼市打吡」榜首大戰，相信文帥會避重就輕，今場一於捧細盤。

（有線61及201台周三凌晨3時45分直播）

此組多蒙特同皇馬已確定首次名出線，阿積士暫以1分壓住曼城，並且對賽成績佔優，曼城領隊文仙尼話今仗作客多蒙特會全力求勝，不過斯維就唔係好信嘞！睇番賽程，曼城嚟緊周末英超將主場迎戰宿敵曼聯，打吡戰之餘仲係榜首大戰，對聯賽爭標非常關鍵。助教柏列話球隊傷兵太多，曼城迫不得已要起用主力對多蒙特，但心態如何不言而喻。回首近兩屆歐聯，曼城唔擅踢作客賽事，五場僅得一勝四負，絕對信唔過。不過多蒙特剛於聯賽同拜仁搏到盡，成班「蜜蜂仔」攰爆，加上已穩奪首名出線，今仗兩軍各有hea踢理由，首選細盤。
皇馬例行公事專嗒阿積士

另一場皇馬主場迎戰阿積士，「艦隊」剛於馬德里打吡勇挫馬德里體育會一洗頹風，之前備受壓力嘅教練莫連奴鬆一口氣，其愛將C朗亦以一記火箭式罰球打破三場入球荒，腳風轉順下，相信都想keep住贏波勢頭。阿積士名副其實係皇馬「私房菜」，過去五次交手全敗兼輸兩粒或以上，其中有兩次更屬例行公事，可見皇馬一向冇面畀，「讓球主勝」值追。

（有線63及203台周三凌晨3時45分直播）