狼堡立立亂唔怕反

猪拉多纳

漢堡天才叉足電復出

禾夫斯堡今晚喺主場同漢堡合演德甲「日韓大戰」，1.88倍「讓球客勝」抵捧。最近禾夫斯堡高層發生大地震，教頭馬加夫被炒，新總監艾羅夫斯上任，據講日本隊長長谷部誠好可能要執包袱，相反漢堡有南韓新星孫弘民復出，旺開要再追！（有線61、64、201及204周一凌晨0:30直播）

雖然馬加夫喺09年幫禾夫斯堡創造歷史，勇奪德甲冠軍，但佢上年重返球隊，就冇辦法再做救世主，高層見勢色唔對隨時降班，上個月索性請佢食無情雞，看守教練哥斯特拿上任後有4勝1和2負戰績，但偏偏喺呢個時候，禾夫斯堡無情白事又硬撬雲達不來梅總監艾羅夫斯過檔，高層權力鬥爭立立亂，班球員有乜法子唔擔心吖。
高層地震醞釀換血

「狼堡」先換教練，又請買賣球員專家艾羅夫斯做新總監，擺明係為跟手喺冬季轉會市場重開鋪路，照咁睇，禾夫斯堡肯定有大把人要執包袱，軍心難免不穩。事實上，消息指最近重奪正選嘅長谷部誠，據講可能會重返浦和紅鑽，同時禾夫斯堡打算收購甘馬雷斯中場大衞艾迪同祖雲達斯中堅盧斯奧，即係話，至少要踢走多2件球員。

對家漢堡周中有孫弘民因傷休息，依然喺主場以3:1打沉史浩克04，狀態回勇，消息話呢位「南韓天才」今晚會復出，叉完電肯定更加醒神，就算有大腦雲達華治養傷，中場托爾基阿斯蘭停賽都唔怕，始終漢堡近3次作客禾夫斯堡有2勝1負，心理上唔會輸蝕，信得過孫弘民就捧漢堡啦！
兩軍互撼大細單跳

‧雙方近7次對壘入球大細單跳，對上1次開出入球大。

‧禾夫斯堡主場及漢堡作客落敗率分別為50%及43%。

‧兩隊近10次對賽總共有3次打和，比數皆為1:1。