北部打吡禾堡擦漢堡

猪拉多纳

換咗教練一天都光晒

周日凌晨場德國國家打吡大家一定睇到津津有味啦，雖然拜仁做咗冬季冠軍，分數上同多蒙特、史浩克04有一段距離，但呢班波有隨時失靈嘅前科，突然會狂爆冷開下盤開足一個月都唔奇，所以今季德甲形勢絕對唔係大局已定，分分鐘幾個星期已經變天，禾夫斯堡正正係最近幾個禮拜變晒天嘅球隊，馬卡夫一炒，一天都光晒。小妹寧買當頭起，今晚當然係支持「狼堡」。（有線61及201台周一凌晨零時30分直播）

禾夫斯堡對漢堡係北部打吡，戰情一定夠激！之前禾夫斯堡曾接連打敗利華古遜同賀芬咸，踢出百二分高水準，令球迷另眼相看，雖然上周中輸畀慕遜加柏，但最緊要係陣中球員士氣正佳，自從馬卡夫被炒後，起碼暫時主場保持不敗，球員踢起上嚟表現落力，尤其是長谷部誠、迪亞高，一人走多一步，自從高士拿上台，「狼堡」已經連奪10分。
漢堡冇雲達華治好傷

最令漢堡教練芬克頭痛嘅係雲達華治受傷已肯定提早歇冬，無咗佢對漢堡有好大負面影響，托爾基阿斯蘭停賽又令芬克喺中場線再少一個選擇。漢堡已經連續兩場作客零入球，季內只曾小勝過兩場作客賽事，對手分別係包尾嘅奧格斯堡同尾二嘅格雷特霍夫，而且今季漢堡如果先落後的話，更加係一分都未拎過，睇嚟真係唔多識踢逆境波，今晚小妹一於撐禾夫斯堡贏北部打吡啦。

Kit推介：禾夫斯堡勝