唔妥肥賓車仔冇heart獻細

猪拉多纳

車路士由新帥賓尼迪斯領軍後連續兩場同對手互交白卷，今次喺倫敦打吡作客韋斯咸仍要讓波，細鬼認為車仔客Ｗ絕對唔抵玩！賓帥不得車迷歡心，而且未解開費蘭度托利斯呢個死結，問題多多，相信會延續頹勢，預期今場入波唔多，細盤有1.88倍博得過！

（有線300及200台周六晚8時45分直播）

自從車路士老細阿布任命賓尼迪斯為帥後，似乎班波問題仲多咗，賓帥帶領利物浦時期得罪過車迷，若然上任後場場贏就話可以用靚績塞住班Fans把口，衰在佢帶隊頭兩場踢得悶又贏唔到，梗係畀人噓啦！作為成功領隊，必須得到各方支持，但佢明顯畀人感覺淨係得老細支持，未獲球員力撐，同時不得球迷歡心，睇怕嚟緊都係舉步維艱。
韋斯咸主場硬淨守得住

仲有一個問題令到賓尼迪斯好頭痛，就係點樣激活前鋒費蘭度托利斯，今年呢位球星繼續成為傳媒話題，早排有啲起色，近期又沉番，始終無復當年勇，球迷眼睛係雪亮嘅，見到佢冇表現實鬧啦！細鬼認為應該畀佢抖幾場調整狀態，但幕後人鍾意呢個西班牙球星，唔出又有壓力，領隊左右做人難處境好尷尬，繼續咁踢法想入波都幾難。

相比之下，韋斯咸踢法實實際際冇乜花巧，主場出擊硬橋硬馬，守得都算穩陣，早前曾經同勁旅曼城互交白卷，有能力頂住車路士攻勢，客勝熱而不穩，細鬼鍾意細盤多啲。