西德聖殿打吡「大」典

猪拉多纳

皇馬變阿二搶攻馬體會

今晚上演兩場矚目打吡，早場為拜仁慕尼黑在安聯聖殿迎戰多蒙特的「德甲打吡」，以及皇家馬德里在巴拿貝聖殿迎戰馬德里體育會的「馬德里打吡」。以往多數陪跑嘅馬體會，今季突然變身爭標要角，在大勇射手法卡奧帶領下，喺聯賽只差榜首巴塞隆拿3分；相反皇馬淪為首都2哥，乜面都冇晒，近況又差，今仗適逢同市死敵，誓必搏甩髀打場翻身仗。兩軍戰意高昂，加上過往對碰經常大手交易，大盤有買趁早。

（now 632周日清晨5時直播）

馬體會今季嘅成功，離唔開大熟大勇嘅法卡奧，呢位哥倫比亞射手唔單止能左右開弓，頂上功夫亦一流，臨門一腳異常冷靜，更係極刑劊子手，真係瓣瓣掂，佢喺各項賽事轟入14球，仲要球球關鍵，「禁區之王」當之無愧。教頭施蒙尼亦以佢為進攻核心，輔以阿達杜倫、阿祖安盧比斯、魯爾加西亞等輪流支援，多點開花，令攻勢更加立體化，入球自然滾滾而來。不過馬體會季初多遇弱旅，上月初作客華倫西亞即現形輸波，因此唔好睇得佢哋太高。
C朗決破入球荒

皇馬上仗聯賽輸畀貝迪斯，已落後巴塞11分，主帥莫連奴一向唔輸得，若能擊敗聯賽次席兼死敵嘅馬體會，絕對可振奮士氣重上正軌。雖然射手C朗拿度腳風欠順，近7仗入得1粒，但咁樣反而更能刺激佢嘅決心，誓要喺打吡大戰發威，戰意毋須懷疑。皇馬近年不但食住馬體會，近8次碰頭有6次開大，證明喺打吡戰嘅仇恨中，大家都會火力全開冇保留，首選大盤。
馬德里保皇

皇馬近年專食馬體會，近10次對賽皇馬取得9勝1和，當中最近8次全部贏晒，王牌前鋒C朗面對同市宿敵腳風特別順，連同上季次循環大演帽子戲法，C朗近5次對馬體會個人射入7球，只有1次交白卷，睇吓C朗今場可唔可以打破近期入球荒。
近10次馬德里打吡

球季 賽事 戰果

11/12 西甲 馬負1:4

西甲 皇勝4:1

10/11 西甲 馬負1:2

西盃 馬負0:1

西盃 皇勝3:1

西甲 皇勝2:0

09/10 西甲 皇勝3:2

西甲 馬負2:3

08/09 西甲 皇和1:1

西甲 馬負1:2