勝利光輝保你「大」

猪拉多纳

主力踢太公波防線散晒

近排狀態弗到漏嘅墨爾本勝利，今日主場迎戰作客仲未開齋兼陷入低潮嘅珀斯光輝，主勝睇落依絲執，不過喺雙方各自有防守主力入伍同埋坐波監嘅情況下，隨時合作做番場澳職獨腳「大」戲，1.68倍入球大比主勝更加穩陣。 （有線64及204周五下午4:30直播）
勝利雙翼齊飛火力猛

近4場拎咗10分嘅墨爾本勝利，上場作客大部分時間打少個都淨勝西悉尼流浪者兩粒，士氣正值巔峰，但係除咗被逐嘅中堅森加拉查今場要坐波監外，另一中堅米利根同箭頭艾奇湯臣亦被澳洲徵召備戰東亞盃外圍賽，防守能力頓時削弱，好在近3場入3球嘅右翼納博特同球隊神射手、左翼馬高洛查士冇傷冇病，可以雙翼齊飛，攻擊力繼續有保證。

珀斯光輝今季淨係主場先識贏波，不過佢哋近期陷入低潮，近兩場主場出擊夾埋只攞得1分。再者，佢哋有占美遜同特威迪兩名後防入選澳洲國家隊之餘，出任防守中場嘅隊長積及般斯亦儲夠黃牌要停賽，連防線第一道屏障都冇埋，今場惟有寄望前線史美斯同美梅特生性，趁對方中門大開入多幾球，幫補自己嘅防守漏洞。