米倫拿列奧大炒格

猪拉多纳

4強次回合盡地一煲

南美球會盃四強次回合，哥倫比亞班霸米倫拿列奧首回合成功悶和阿根廷「奇兵」堤格雷0比0，今仗返回主場係時候採取主攻，爭勝贏波晉級。至於堤格雷來到生死關頭亦唔會坐以待斃，一旦攞到作客入球，將會非常着數，唔可以低估其反擊決心，Mic少一於捧入球大。

（有線61及201台周五早上8時15分直播）

米倫拿列奧自知作客唔掂，所以首回合去到阿根廷，全隊踢法顯得好保守，無非想留前鬥後，返到主場再全力搏殺。初步來睇策略已經成功一半，唔少莊家亦睇好佢哋可以贏波晉級，主W被壓低至1.38倍。事實上，米軍主場已連贏六場，包括上兩圈南球盃3比0大勝彭美拉斯，以及3比1擊敗甘美奧。米倫拿列奧主場能夠輕取兩支巴西球隊，擺到明係地頭蟲，相信今仗亦無懼堤格雷來犯，照攻可也。
堤格雷爭作客入球

堤格雷日前終於打開今季聯賽勝利之門，狀態算係有所改善，當然希望食住個勢，擊敗米倫拿列奧。尤其南球盃屬於淘汰賽，今場輸波就冇得再玩，一旦堤格雷落後，必然會傾巢而出反撲。而且基於作客入球優惠賽制之下，堤格雷入一個作客入球，主隊必須入番兩粒先至可以晉級，制度上鼓勵雙方進攻，今場應會有一場火併，吼入球大啱數。