史浩克得分點多搶食漢堡

猪拉多纳

今晚德甲、德乙同英超都開快車，我哋有線一於奉陪到底，開足頻道大播特播。德國呢三、兩年大吹亞洲風，日本、韓國仲有華人球員，例如清武宏嗣、鄭大世同林志堅同張呈棟等等都喺唔同球會有佢哋所屬位置。其中今晚漢堡主場迎戰史浩克04，大家就有機會睇到南韓前鋒孫弘民呢位新星。不過期待還期待，漢堡依家成隊波靠晒孫弘民並唔係好事，相反史浩克陣內擔大旗嘅球員極多，呢個亦都係兩隊實力上最大分野，史浩克作客讓半一照撐！

（有線61周三凌晨3:00直播）
孫弘民拒續約損士氣

雖然雲達華治今季重返漢堡，不過已經無咗當年呼風喚雨嘅鋒芒，依家仲要有傷在身出唔到場，單靠孫弘民單天保至尊，呢位南韓前鋒今季已經做咗隊中首席射手，漢堡近期入親波幾乎都係佢包辦。不過有消息話孫弘民已拒絕同漢堡續約，準備轉去更大嘅球會發展，對軍心咪話無影響呀！

史浩克本身都有個日本國腳內田篤人，可惜佢亦係養緊傷唔可以上陣，但好在仲有亨特拉爾、法芬、阿費利同馬利卡呢班好波之人，實力絕對唔需要懷疑，更重要係個個都識入波，得分點分布夠晒廣。何況佢哋喺歐聯成功出咗線，可以放更多心思落德甲度搶分，成績有望繼續上揚，絕對值得支持。
頂占筍盤：史浩克04（上盤）