夏利叔搞唔掂黑貓

猪拉多纳

QPR冇錢班救兵死晒火

新特蘭今晚喺英超主場對昆士柏流浪，肯定會搶主W避免降班悲劇出現。黑貓領隊奧尼爾講明話打算班救兵，相反QPR新領隊夏利列納冇錢買人，佢哋係歐洲5大聯賽唯一未開齋球隊，冇錢燒唔似突然翻生，即使夏利叔上任後首次正式領軍都咪亂捧！

（有線201及301、廣東體育周三凌晨3:45直播）
新特蘭又傷2件 奧尼爾增兵

呢場可能係決定兩隊使唔使降班嘅關鍵大戰，新特蘭剛啱喺主場以2:4慘負西布朗，隊長卡達莫同後衞奧沙更加傷埋，但領隊奧尼爾準備好咗買人，有助維持士氣，對於呢位可以帶李斯特城贏聯賽盃，又幫些路迪殺入歐協盃決賽嘅教頭，我無限量信任！
昆士柏5大聯賽唯一未開齋

對家昆士柏新領隊夏利列納被視為救世主，但由於老細費爾南德斯賠錢炒曉士後唔肯再科水，據講夏利叔只能夠借人護級，球員聽到肯定心都涼埋，未必可以突然撻番着。再講，QPR最有卡士嘅射手森莫亞同隊長朴智星仲未好番，開季聯賽得4和9負點捧得落。

事實上，昆士柏係目前歐洲5大聯賽唯一未開齋球隊，極度羞家，而且簽入嘅所謂大牌球員，例如施斯根本高峰期已過，中場格尼路上場正選位都冇埋，更何況呢場英超橋王大激戰，論戰術部署同領軍經驗，奧尼爾絕對唔會差過夏利列納，所以我決定捧黑貓！
兩隊交鋒7連大

‧兩隊近7次對賽全部開入球大。

‧新特蘭連盃賽近10場上半場得1個入球。

‧昆士柏為今季英超唯一未開齋球隊，得4和9負。

‧昆士柏連續5場上半場食白果。
兩隊鬥保守扒逆水博半場細

新特蘭領隊奧尼爾領軍風格保守，近10場上半場得1個入球，加上昆士柏流浪新領隊夏利列納未摸熟班球員，呢場大家都驚輸，照計唔會一開波就對攻咁夠膽，就算兩隊近7次對賽全部開入球大，都未必會喺上半場開始駁火，話晒都係護級「6分波」，全失3分好大鑊o架嘛，扒逆水玩半場入球細隨時有驚喜！