凱沙讓波不如玩「大」

猪拉多纳

周中快車期，德甲、德乙同英超我哋有線都會有直播，梗係趁機買幾場過下關啦！今晚我哋球彩台都有獨家直播凱沙羅頓主場對雷根斯堡呢場德乙。由於主客雙方實力相差都幾遠，「讓球主勝」係其一選擇，但考慮到凱沙羅頓和波率偏高，大家要小心佢哋喺快車期會出事，咁就不如買低水少少嘅入球大，起碼夠穩陣。

（有線64及204台周三凌晨零時30分直播）

凱沙今季跌番落乙組，實力理論上超晒班，依家排緊第3位，仲係唯一不敗球隊。可惜踢咗15場聯賽有7場和波，主場成績亦只得4勝4和，冇榜首球隊布倫瑞克嗰種高勝出率，買讓球勝唔穩陣。不過呢隊波勝在攻力夠，差不多平均一場入兩球，又有好多踢過德甲嘅球員在陣，唔使驚冇波入嘅。另外，凱沙今季失過16球，當中11球（接近7成失球）係來自下半場比賽，證明佢哋後勁唔多夠。
雷堡防線場場甩漏

對手雷根斯堡係升班球隊，依家同辛特侯遜同得10分包緊尾，睇嚟下季又要降班喇！球隊作客成績當然唔見得人，得1勝6負，曾經贏過嘅咪就係同分嘅辛特侯遜囉，佢哋近況奇差，近7場1和6負，場場失波，睇嚟今晚都冇可能保住不失，咁樣呢場揀入球大最明智！
Wendy推介：凱沙羅頓 大