主將銷假巴塞搏殺格

猪拉多纳

上季異軍突起嘅利雲特仍然保持佳績，但今晚喺主場迎戰巴塞隆拿，都幾難有運行！除咗繼續強勢嘅「球王」美斯，兩大攻擊手韋拿同恩尼斯達仲寧願練波都唔放假，對今場比賽相當認真，睇怕利雲特都難逃大敗收場，1.53倍「讓客」用嚟做過關膽都唔錯o架！

（now632台周一凌晨4:00直播）

雖然美斯不停破紀錄，但小妹無論睇呢位「球王」入幾多粒仍然樂此不疲，佢上場歐聯對莫斯科斯巴達又入兩球，係連續3場梅開二度，並已經將今年嘅總入球數字推到80個，要喺2012年剩番嗰7場球會賽事入多5球，挑戰梅拿保持嘅85球年度入球紀錄，美斯仔今場當然要再發威，為自己入多幾球啦！
利雲特後防大將停賽

巴塞之所以咁強，除咗本身班波技術默契一流之外，仲係因為夠勤力，西班牙《體育報》就發現足踝有些少問題嘅韋拿同恩尼斯達兩件「鬥牛兵」，居然有假唔放走返訓練場做輕量訓練，明顯係想操到弗一弗大炒利雲特，可惜韋拿最後都好大機會要抖抖。主隊對住華倫等同級球隊雖然有好表現，對住皇馬都幾乎唔輸，只可惜後防大將柏度盧比斯要坐波監，今場對巴塞都係凶多吉少o架喇！