守風唔順車仔惡搞

猪拉多纳

車路士老闆阿布拉莫域自03年入主之後，炒教練當食生菜，由雲尼亞里炒到迪馬堤奧，相信係其中一支炒教頭最多嘅歐洲球隊。其實換帥未必係件壞事，起碼車路士近幾年都經常捧盃，對老闆及球迷都算有交代。之前好多人都話迪馬堤奧行運，無端端喺保亞斯手上接過帥印，而車路士喺畀人睇小嘅情況下，又贏得足總盃及歐聯錦標，真係講你都唔信。可惜呢段蜜月期唔夠一年就告終，今日車路士已改由賓尼迪斯接手。

有時都好難怪阿布，始終佢請過名帥莫連奴帶隊，往後接任嘅領隊都難免會同「寸王」作比較，試問當今球壇又有幾多人可以同佢平起平坐呢！Peter亦覺得阿布畀歐聯勝利沖昏頭腦，以為單靠進攻可以贏盡一切，所以今年喺夏天轉會市場只集中買進攻球員，如奧斯卡杜斯山度士、夏薩特、域陀摩西斯……但呢個做法令到球隊四線失衡。Peter經常強調球隊成功需要三個因素，防守、防守同埋防守，車路士防守力減退，成績自然受影響。
轉會窗搵轉機

車路士聘請賓尼迪斯，Peter睇唔出佢有能力點石成金。當年利物浦畀佢搞一搞，依家都仲未起得番。不過咁，世事無絕對，如果一月轉會市場可以買幾個高防守力球員幫手，車路士又有唔同打法。
金句：炒迪馬堤奧未必大敗着，請賓尼迪斯可能超敗着