韋斯咸「+1」算舊帳

猪拉多纳

熱刺低潮 仇家踢館

英超今晚仲有場倫敦打吡戰，熱刺主場對韋斯咸，兩隊本身關係唔多好，近年仲要因為爭奪倫敦奧運場館使用權搞到面左左，「錘仔幫」家陣排名高過熱刺，肯定想繼續騎住死敵，趁熱刺陷入低潮，今戰「錘」扑落水狗，受讓要「讓球客勝」！

(有線301及201台周一凌晨零時直播)

韋斯咸及熱刺關係千絲萬縷，現時熱刺主將柏加同迪科爾打過「錘仔幫」，名帥夏利列納帶韋斯咸響朵，其後改教熱刺令兩間球會矛盾加劇，敵對指數大增。近年兩間球會同時間睇中奧運場館，爭到面紅耳赤，依家冇晒偈傾，韋斯咸今季重返英超，季初成績對辦，一定想壓住熱刺！
主隊艾迪巴約停賽

熱刺今季改由保亞斯領軍後不進反退，近期再陷低潮，對上六戰只贏一場，最傷係前仗喺打吡戰畀阿仙奴大炒，士氣嚴重受挫。計晒聯賽及歐霸盃，熱刺連續三場作客，佢哋用來用去都係十零個球員，班兵連場拚搏已經好攰，今戰仲有艾迪巴約停賽，又得番迪科爾喺前線單打獨鬥，好難搞。

韋斯咸專心應付聯賽，近期愈踢愈好，早前主場打和曼城，前仗作客贏埋紐卡素，演出對辦，今場雖有中場班拿約養傷，但最重要係兩大進攻重心安祖卡路爾同路蘭踢得，有本錢爭取士哥。「錘仔幫」近兩次鬥熱刺一勝一和，不落下風，今場預期都可搶分而回。