車仔借「斯」還魂

猪拉多纳

賓帥誓摘「藍月亮」冧fans

車路士新帥賓尼迪斯領軍首戰今夜爆發，喺主場惡鬥「藍月亮」曼城，賓帥闊別英超兩年，臨危上「車」志在撈份長約，定必施展混身解數討好老細阿布，呢位西班牙名帥被譽為世界級戰術大師，功力遠在文仙尼之上，頭炮打大波當正係盃賽決賽部署，坐和望贏，平手盤捧車仔！

（有線300及200台周一凌晨零時直播）
王子勢翻生

賓尼迪斯一手將利物浦打造成為歐洲王者，任內剋住當年帶領車路士嘅寸王莫連奴，喺08/09季度差啲就可以幫紅軍取得史上首個英超冠軍，功力深厚，如非紅軍上手美國老細希斯同吉列搞走佢，利物浦都唔使冧檔要大執。賓帥其後喺國際米蘭失意被炒，今次獲阿布邀請上「車」教到季尾，呢段試用期實出真功夫省靚自己個招牌。

車路士近況低迷，對上八戰只贏一場，連續十場有失波，喺上手教頭迪馬堤奧帶領下攻強守弱，依家由賓尼迪斯接手，踢法肯定會有大變。賓帥擅用區域聯防，着重防守部署，車仔防線不穩，搵佢執就啱晒，雖然今戰續有中堅泰利養傷，但預期球隊後防演出會大幅改善。此外，賓帥同愛將「王子」費蘭度托利斯故劍重逢，呢位射手大有機會重拾射門鞋。
往績食曼城

相比起賓尼迪斯，曼城教頭文仙尼級數差得遠，揸住一手好牌都連續兩屆喺歐聯分組賽出局，早前球隊陷入低潮，文帥束手無策露晒底，係得咁多料，班波能夠位居前列，全靠有班高質球員撐住，靠文帥變招，晨早死得啦！曼城防線重心高柏尼有傷在身未必踢得，隨時要搵拿斯達錫拍住尼史葛扼守中路，喺大戰一次犯錯足以致命，呢對中堅組合難以予人信心。

睇埋往績，車路士對上七次主場對曼城錄得六勝一負，唯一敗仗係09/10季度輸2比4，當時打少兩個，冇乜參考價值。車仔有新帥效應，仲有靚績支持，平手盤唔買仲等幾時？