泰國馬國地利爭標

猪拉多纳

東南亞錦標賽 今日強勢Kick Off！

東南亞錦標賽（Suzuki Cup）決賽周今於泰國同馬來西亞舉行，共八支球隊參加。泰國上屆大熱倒灶，本屆有主場之利下，德國名帥舒哈化勢必率領泰國捲土重來；而上屆冠軍馬來西亞衞冕亦雄心壯志，預料兩支東道主分組可輕鬆出線！

東南亞錦標賽前身為虎啤盃，九六年開始舉辦，今屆已經係第九屆，之前八屆泰國同新加坡分別各奪三屆冠軍，馬來西亞上屆就繼越南之後，首次取得錦標。本屆續由兩國合辦，A組賽事全部於泰國進行，而B組所有比賽均於馬來西亞角逐。
黃昏開波　唔使捱眼瞓

此項盃賽大部分比賽均於香港時間黃昏或晚上進行，比目前歐洲主流聯賽較早開波，對於唔願捱眼瞓嘅球迷肯定有一定吸引力，而且now（670及671）同馬會指定場外投X處都有直播，一邊食飯一邊睇波夠晒刺激兼充實。數今屆奪標熱門，東道主泰國肯定係其中一分子，泰國去年搵英格蘭名宿白賴仁笠臣執教，但呢位教頭踢波就叻，教波出名唔掂，佢人生路不熟來到泰國，更難發揮所長，所以泰國在佢執教下，成績並冇顯著改善，如今因病掛冠而去，泰國改由名帥舒哈化領軍，今次盃賽正好讓這位曾執教不少德國球隊的名帥一展身手，要在Ａ組突圍應無難度。
越南新加坡當攔路虎

Ｂ組以馬來西亞及新加坡實力較強，馬國主帥積高彭以上屆冠軍班底，合作及默契較佳，衞冕前景樂觀。而新加坡陣中有多名質素不俗歸化球員，惜部分主將年紀偏大，分組賽料可過關，但爭標就要看奇迹。
賽制

決賽周8隊分兩組，每組4隊採單循環制，每組首兩名進身準決賽。A組於泰國舉行，B組於馬來西亞舉行。分組賽若出現同分，將順序以下列方式定排名：1.分組賽中得失球差　2.分組賽中得球數字　3.分組賽中有關隊伍的對賽成績　4.若有關隊伍於法定時間90分鐘後，對賽成績仍然相同，即以互射12碼決勝負　5.抽籤

準決賽及決賽採主客兩回合制，兩回合計打和，將計算作客入球優惠，未分勝負則於次回合法定時間後加時30分鐘，加時仍計作客入球優惠，再和則以互射十二碼決勝。