蘇斯達手到拿來

猪拉多纳

卡路士韋拿腳風順

今輪西甲獨腳戲，由皇家蘇斯達打頭陣，坐鎮主場迎戰奧沙辛拿。皇蘇嘅墨西哥射手卡路士韋拿腳風順番，連帶令球隊重上正軌，挾住強勁主場氣勢，有力喺尾二嘅奧沙辛拿身上再斬四両，主勝實屬不二之選。

（now 632周六凌晨4時30分直播）

由於大部分南美進攻球員都係藝高人矮細，因此唔太適應着重身體對抗嘅英超，皇蘇嘅卡路士韋拿就係典型例子，呢位細粒前鋒當年就算効力技術流嘅阿仙奴，但對住一眾亂衝亂撞、高強度壓迫嘅守將，真係踢到頭痕，不過，自從改投皇蘇後立即如魚得水，始終西甲各隊以地波推進為主，令卡路士韋拿可以揚長避短，有空間發揮佢嘅技術、靈活及速度優勢。

今季皇蘇嘅進攻體系中，有高大中鋒伊法蘭頂在箭頭位置作掩護，「小快靈」嘅卡路士韋拿同基沙文便伺機後上入楔，令對方防不勝防，兩人已炮製八個聯賽士哥，佔咗皇蘇總入球五成，其中卡路士韋拿近兩仗轟三粒，帶領球隊取得連捷，實在唔係嘢小。
奧沙辛拿復甦係虛火

睇落尾二奧沙辛拿有啲起色，近兩仗搶四分兼一球不失，但賽和馬拉加全因對方有歐聯後顧，贏表現極度飄忽嘅愛斯賓奴更加不能作準，前線靠嘅安歷基蘇拿，你估真係安歷基加蘇拿咁勁咩？查實「安蘇」表現仲衰過隊中另一射手荷西巴洛蘭迪，加上主力索查、連奴、賓奴等因傷缺陣，今仗面對於主場踢高兩皮、近況回勇嘅皇蘇難有運行，「地頭蟲」出場梗係買主勝喇。