哨牙蘇領「軍」教訓年青人

猪拉多纳

利物浦爭出線唔贏好頭痕

不成功，便成仁，利物浦今晚喺歐霸盃A組主場迎戰瑞士球隊年青人，一旦失分就隨時分組賽出局，領隊羅渣士為免咁羞家，今場決定派王牌前鋒蘇亞雷斯領軍，希望強陣出擊炒起對手，呢班「年青人」作客嚟到晏菲路球場睇怕難逃一劫，紅軍1.9倍「讓主」捧得過！

（有線61及201周五凌晨4:05直播）
英超神射手孭飛速戰速決

賽前利物浦暫時力壓同得6分嘅年青人排第2，加上分組最後一場要作客硬撼烏甸尼斯，萬一今場贏唔到出線真係危危乎。先唔好講年青人上輪分組賽作客烏甸尼斯贏波唔嘢小，而且紅軍喺嚟緊英超快車對完史雲斯後就又作客熱刺，想留力備戰當然希望今場盡早奠定勝局，小妹估計領隊羅渣士會繼續派遣位居英超神射手榜首嘅蘇亞雷斯擔正，務求靠呢位近6場入6球嘅前鋒加上主場威力，盡早搞掂年青人。

雖然同「哨牙蘇」合作無間嘅天才翼鋒史達寧，近日因捲入傷人案接受警方調查，今場可能會收起避一避風頭，好彩羅渣士麾下仲有早幾日19歲生日嘅蘇索，呢位創造性及走位皆精嘅中場，喺上輪聯賽因戰術需要早早被調走，抖夠後今場同蘇亞雷斯拍住上，要射穿防線不穩、作客連續8場都有失球嘅年青人並唔難。
年青人作客連續8場失波

今場對啱啱復出嘅門將連拿亦係一個里程碑，皆因如果佢正選上陣就係第81次喺歐戰把關，超越傳奇門神基文斯保持嘅80場「利物浦門將歐洲賽上陣紀錄」，相信佢同班後防拍檔都會醒醒定定，大炒一場照計走唔甩喇！
年青人穿窿哨牙蘇開「大」餐

如果近排弗到爆嘅蘇亞雷斯正選上陣，對利物浦絕對係火力保證，而且年青人近期作客表現唔太穩陣，連續8場失波之餘仲有5場至少失2球，啱晒「哨牙蘇」同佢班手足開「大」餐，1.6倍入球大熱都值得捧。
紅軍對瑞士兵8戰不敗

‧利物浦較早前喺分組賽作客年青人贏5:3，係今屆賽事至今最大比數。

‧利物浦9次對瑞士球隊，獲6勝2和1負，近8戰都保持不敗。

‧年青人前鋒波巴迪拿暫以4球列分組賽次席射手，比拿玻里嘅卡雲尼少1球。

歐霸盃A組