基輔戴拿模當PSG冇到

猪拉多纳

派紀念品引粉絲坐爆主場

近排天氣轉涼，大家記住着多件衫，不過講到凍，香港點都唔及烏克蘭。烏克蘭聯賽就快步入歇冬期，基輔戴拿模今年淨番兩場主場賽事，據聞啲波飛賣得好行，今晚喺歐聯A組鬥巴黎聖日耳門場波預期會坐爆，氣氛咁好，又要爭出線，對住傷兵滿營嘅PSG可以秤先，平手盤當然捧主隊。

（開賽時間：周四凌晨3:45）

烏克蘭聯賽12月頭歇冬，明年3月先重開，基輔會方好有諗頭，今場同嚟緊兩場主場賽事都搞搞新意思，向每位入場球迷送番份紀念品。據講反應唔錯，下仗鬥基輔阿仙奴嘅波飛已經售罄，今晚對聖日耳門亦勢必坐爆，聲勢浩大，況且基輔家陣喺A組得4分排第3，要爭出線真係不容再失。

作客嘅PSG近3場聯賽都失分，上場打多兩個照輸畀雷恩，狀態係點大家有眼見。教練安察洛堤前日話球員嘅比賽態度有問題，坦承隊波陷入危機，咁又係呀，除咗查列同保迪馬兩位悍將倦勤，PSG仲有一對鋒將文尼斯同加美路打柴，呢排伊巴謙莫域咁招積，樹大招風隨時冇啖好食，基輔唔使讓梗係抵玩啦。

歐聯A組