城皇戰好睇唔好賭

猪拉多纳

歐聯死亡D組大戰，曼城主場迎戰皇家馬德里，表面上曼城出線機會微乎其微，皇馬則未穩奪16強資格，爭勝心以客軍較佳，不過曼城一眾球星為挽回尊嚴，加上有主場之利，冇心理包袱之下隨時有神來之筆，所以今場形勢耐人尋味，勝負料取決於曼城球員的心態，從欣賞角度當然達五星級，但從菠菜而論，絕非一場值得押重注的賽事。

皇馬雖然貴為9屆冠軍，但最輝煌時期卻喺五、六十年代，當時資訊科技並不發達，一把年紀嘅Peter未能親眼目睹其豐功偉績，只知當時傳媒仍將西班牙文「Real」以英語直譯，把這支國內班霸稱為「真馬德里」，可見年代之久遠。皇馬對上一次捧盃已經是10年前，近兩屆在莫連奴帶領下成績雖有改善，可惜均在四強止步，如果到莫連奴離隊之日，仍然未能為皇馬帶來第十次歐聯錦標，對這名葡萄牙教頭來說肯定是失敗。

曼城頭4輪演出令人失望，如今只餘數字上出線機會，球隊上周末剛在聯賽大勝阿士東維拉，足證球員鬥心仍在，就算無緣角逐歐聯錦標，為免繼續沉淪而影響本土衞冕機會，相信文仙尼亦唔會太早放軟手腳。
金句：皇馬過關要睇曼城球星心情