華倫鋼鐵主場頂得住拜仁

猪拉多纳

歐聯F組榜首之戰，華倫西亞主場對拜仁慕尼黑，拜仁今季喺德甲打橫行，但踢歐聯並非特別超班，尤其係作客更可以用失望來形容，而且形勢上和波亦可以接受，預料拜仁唔會太冒進。華倫今季各項賽事主場八戰七勝一和，絕非善男信女，今仗有得受讓，1.83倍「讓球主勝」抵玩。

（有線62及202台周三凌晨3時45分直播）

拜仁一度獲睇好可以輕鬆喺F組跑出，但實際情況又係另一回事。首仗主場只小勝華倫2比1，之後作客更輸畀巴迪，另一場作客亦僅贏最弱嘅里爾1比0，可見踢德甲同歐聯有好大區別，大家唔好受名牌效應影響。事實上，拜仁只要餘下兩場保持不敗就可以出線，唔好太高估佢哋爭勝意欲，加上畢竟今仗作客，如果踢法太進取，隨時正中擅長突擊嘅華倫下懷。華倫最後一輪對手係已篤定出局嘅里爾，應可順利全取3分，因此只要今場唔輸，出線機會高唱入雲，幾大都要頂住拜仁，相信「蝙蝠兵團」可繼續保持本季主場不敗金身。
里爾出局 明益巴迪

同組巴迪主場對里爾，白俄羅斯球隊巴迪冇得選擇，一定要攞齊3分先可以保持晉級希望，佢哋首循環作客都贏3比1，更何況里爾已提早「畢業」，戰意大不如前，睇好巴迪可再翻啅對手，要主勝。

（周三凌晨1時開賽）
F組出線形勢

F組里爾已經出局，拜仁慕尼黑、華倫西亞及巴迪爭兩個出線席位，華倫形勢最好，只要今仗擊敗拜仁，就可以取得出線資格。拜、華同為9分，今輪互撼必然有一隊失分，或者和波各失兩分。第三位嘅巴迪只落後3分，只要今場擊敗里爾，即可拉近距離，至於巴迪能否從後趕上晉級，最後一輪作客拜仁將成為關鍵。