東岸決賽博侯斯頓贏多鋪

猪拉多纳

聽朝會上演兩場美職季後賽次回合賽事，喺西岸決賽方面，洛杉磯銀河首回合主場大勝西雅圖海灣者3:0，足智彩並冇為呢場波開設「晉級賠率」，相信衞冕嘅銀河晉級已經毫無懸念。至於東岸決賽方面，排名較低嘅侯斯頓戴拿模首回合喺主場以3:1擊退常規賽季軍華盛頓聯隊，博華盛頓聯隊反勝過關有成6倍咁多，但以佢哋近期嘅走勢，返主場想平反敗局並唔容易，寧願博受讓平半嘅侯斯頓戴拿模。（開賽時間：周一清晨5:00）
華盛頓火力曳難平反敗局

睇番殺入東、西岸決賽嘅4支球隊，常規賽排名都係排喺中游位置，首、次名嘅聖荷西地震同肯薩斯體育會都已經喺上圈畢業，就明白「三哥」華盛頓聯隊並無優勢可言。事實上佢哋到季尾傷兵問題愈嚟愈嚴重，搞到近4戰先至贏得1仗，況且近9戰僅得1場入多過1粒，就算上季MVP迪羅沙里奧及時復出，都唔似有足夠火力收窄首回合落後兩球嘅差距。

對手侯斯頓戴拿模今季因為要兼顧中北美洲冠軍盃，搞到聯賽戰績未見突出，季後賽要由淘汰圈打起，但勝在佢哋狀態來得及時，季後賽4戰共入7球，火力遠勝華盛頓聯隊，加上近3次交手全部贏晒，受讓平半相當抵博，大貪嘅不妨直取2.9倍客W。

首回合：華客負1:3
美職季後賽賽制

採主客兩回合淘汰制，今輪為東、西岸決賽次回合，不設作客入球優惠，若總比數相同，會於次回合後加時作賽，再和就互射12碼決勝。