拉科冇錢後防又唔掂 撐利雲特1.73倍「W」

猪拉多纳

今晚西甲拉科魯尼亞主場迎戰利雲特，主隊近期爆出財困消息，或多或少影響大軍士氣，加上去仗先入兩球，最終都被薩拉戈薩反啅5:3，軍心進一步受挫，就算今晚對手利雲特近況麻麻，拉科要贏都唔多樂觀。利雲特雖然近4場不勝，但表現絕對唔曳，上仗喺主場水戰皇家馬德里，全場不落下風，互有攻守，去到比賽尾段先失波輸1:2，演出衰唔晒，今場作客拉科有得受讓，1.73倍「讓球客勝」唔怕捧喎！（now632台周日晚7:00直播）

拉科已喺聯賽榜跌到落尾3，正需要搶分護級，可惜上場聯賽有碧斯做咗「紅牌阿姑」，今場要停賽，影響咪話唔細。後防方面，佢哋表現一直唔多理想，雖然話上場球隊人少打人多，但幾個失波後防責任都好大，幾次畀對手兩邊傳中搞掂，反映後衞跟人、追人唔夠貼，尤其係一對中路守將更加抵打。如果防守無改善，護級前景實在令擁躉們擔心。
馬田斯狀態Fit玩謝敵衞

有啲球員踢大會唔掂，但去到中下游球會就踢高唔止一班波，馬田斯就係呢類球員。踢大會要嘅係效率、整體配合，表現要求穩定，做唔到就要離開；但喺中下游球隊，打單箭頭好多時要單打獨鬥，顧及嘅嘢較少，馬田斯明顯啱踢中下游球隊多過大會，睇佢對華倫西亞同皇家馬德里搞到人哋班後防幾咁唔得閒，兼且有波入添，睇得出呢位尼日利亞射手狀態唔錯，今晚「張峰」推介嘅「讓球客勝」，就係要靠佢食胡啦！

張峰來料：讓球客勝