黑貓鬥心爆棚玩殘富咸

猪拉多纳

雙翼全面回勇，費查大把餐士

今晚英超獨腳戲由富咸主場迎戰新特蘭，兩隊近期都踢出精彩嘅足球，唯一唔同嘅係富咸有分落袋，新特蘭就贏形勢輸波，不過阿占相信好波有好報，「黑貓」有阿當莊臣復甦、施巴斯坦拿臣回勇，應該唔會再輸落去，今場對住防線唔多穩陣嘅富咸有力搶分，新特蘭受讓半一，1.97倍下盤值得支持！（有線200及300、廣東體育周一凌晨0:00直播）

係，雖然新特蘭近6場比賽都未贏過波，睇落真係唔多妥，不過有睇佢哋上星期作客愛華頓場波嘅朋友，都會認同「黑貓」嘅演出真係相當唔錯，如果有運嘅話，上半場已經可以贏幾球，可惜最終黑仔反輸1:2，結果係令人失望，但阿占睇到新特蘭球員嗰團火，只要佢哋保持住呢個鬥志，反彈指日可待。
李察臣打柴 富咸防線穿窿

阿當莊臣、施巴斯坦拿臣同史提芬費查呢三位仁兄，亦係阿占睇好新特蘭嘅另一原因。當中「雙槍將」阿當莊臣上場攻入加盟新特蘭以來第1個入波，信心同士氣大大提升，另外一隻快翼施巴斯坦拿臣跟咗奧尼爾後亦大躍進，有呢對技術速度兼備嘅翼鋒，大隻佬史提芬費查肯定大把餐士入波！

對家富咸上場作客逼和阿仙奴3:3，表現都好精彩，不過佢哋有前無後嘅踢法相當牙煙，近3場聯賽失8球嘅防線，實在難予人信心，何況左閘基蘭李察臣打柴，更進一步削弱富咸嘅防守力，新特蘭絕對有權偷雞，W埋都唔出奇。

頂占筍盤：新特蘭（下盤）
富咸近5戰得1勝

‧新特蘭今季10場聯賽7場開細。

‧富咸近5場聯賽僅得1勝。

‧新特蘭今季6場作客有4場取得和局。
新特蘭穩守博角球細

一隻手掌係拍唔響嘅！富咸係今屆英超平均角球最多嘅球隊（12.91個），佢哋喺主場自己平均都拎到6.36個，可惜今晚對手新特蘭每逢作客就穩守突擊，今季平均每場角球只得10.6個，單計「黑貓」作客仲衰到得1.67個，係全英超客戰最少角球嘅球隊。今晚場波角球中位數係10.5個，2.05倍細幾抵玩。