C朗變身網上賭神

猪拉多纳

蘇豪係曼聯死忠粉絲，今次有幸請來老朋友C朗做訪問，話題梗係圍繞「紅魔鬼」啦，由佢同老費嘅「父子情」，講到佢同自己囝囝相處嘅小片段，唔講咁多，去片！

C朗09年夏天同曼聯和平分手，加盟皇馬後仍然同舊帥費格遜保持良好關係，講起恩師仲係眉飛色舞：「我真係好掛住老費啊，佢好好人，教咗我好多嘢，我之前都講過，喺足球世界入面，佢就好似我老竇咁！」C朗好錫費Sir，擔心佢老人家身體狀況：「佢真係勁好火囉，我有時覺得佢唔可以成日咁鬧人，咁樣對佢心臟唔係咁好！」

C朗本來只係鄉下仔，佢自爆去到曼聯先知咩叫互聯網：「喺去曼聯之前，我唔知咩係上網，依家我每星期會用15至20個鐘頭上網。」到底呢個天王巨星上咩網多呢：「我鍾意上啲賭博網站玩兩手，好多賭場請我去玩，但我想同班老死online玩。」佢仲話好多球星鍾意夜蒲玩model，自己寧願留喺屋企抖吓喎，係咪真係咁乖啊？
球圈冇乜friend 唔識碧咸

自從C朗做咗人老竇之後，確實少咗好多負面新聞，佢亦好享受做爸爸嘅生活：「做老竇真係人生一大快事，每朝起身見到個仔嗌daddy，感覺真係好正！」佢一講湊仔經就停唔到，仲話鍾意幫小C朗沖涼多過換片：「講真，換片有幾難吖，係臭之嘛，我唔多鍾意換，但都有幫手，幫阿仔沖涼容易好多，落啲洗頭水同護髮素捽吓捽吓，過癮好多！」

去到訪問尾聲，循例請C朗同大家分享一個小秘密，佢諗咗陣就話：「我其實唔鍾意同球星做朋友，我都唔識碧咸嘅，喺球圈最熟嗰個係里奧費迪南，佢真係好搞鬼，我有時都會同布朗及朗尼有聯絡嘅。」