利斯菲保地花高鬥搶吼大

猪拉多纳

Leni近期因為工作關係，好多歐洲主要聯賽都只能夠睇重播或精華，直播睇最多嘅係巴甲，今輪利斯菲體育會主場對保地花高，兩軍近期都入得失得，而且形勢上今仗都要搶晒3分，小妹深信呢場會係入球騷，1.75倍嘅入球大係信心推介。（周一清晨5時30分開賽）
保軍5個中場唔防守

保地花高近5場聯賽攞咗13分狀態出色，目前排第5落後聖保羅5分，數字上仲有機會爭下屆南球盃參賽資格，雖然教練奧利華拉話唔敢抱太大期望，但既未絕望壓力又唔大，班球員點都去盡。保地花高畀Leni嘅特別印象係佢哋經常排出「451」陣式，不過4個後衞都好多甩漏，偏偏5個中場都係技術同攻擊型，而且踢踢吓就會愈踢愈前，所以佢哋中場球員幫唔到後防幾多，但就經常入到波，佢哋近5場聯賽共轟入14球，係目前巴甲其中一支最猛火球隊。

至於利斯菲體育會目前排尾4要為護級奮戰，由於巴甲要降4隊，佢哋落後尾5巴希亞3分，未來每場賽事都要以贏波為目標，正因為咁，佢哋近期喺主場大踢開放足球，近3場主場賽事入球都有4個或以上，佢哋嘅陣式係「433」，計前線鋒力喺巴甲可列中游，可惜防線太差，成日前面入埋唔夠後面輸，今輪主場同保地花高對攻，捧入球大分分鐘完上半場已經搞掂。
Leni推介：

利斯菲體育會大 ★★★★

里昂讓球勝 ★★★★

波琴勝 ★★★