馬體會追巴塞格殺勿論

猪拉多纳

西甲第三勢力馬德里體育會，今晚將作客弱旅CF格蘭納達，雖然馬體會早輪經歷兩連敗，但喺鐵帥施蒙尼鞭策下極速反彈，其實馬體會只係落後榜首巴塞3分，絕對有力爭逐聯賽冠軍，對住CF格蘭納達仲唔食住個勢搶分咩？客勝有賣趁早。

（now 632周一凌晨2時45分直播）

講番馬體會之前嘅兩連敗，一場係0比2不敵主場特醒嘅華倫西亞，雖敗不辱，另一仗則盡遣副選作客吞科英布拉大學兩蛋嘅歐霸賽事，明顯有留力之嫌，果然上仗對住實力不俗嘅基達菲，輕輕鬆鬆贏兩粒。
CF格蘭納達傷疲嚴重

的確，自名宿施蒙尼掌舵，馬體會嘅「海鮮味」冇以往咁濃，面對弱旅應贏則贏，非常正氣，除了星級殺手法卡奧之外，施帥麾下仲有阿祖安盧比斯、迪亞高哥斯達、基斯甸洛迪古斯、阿達杜倫、安利等猛將輪換，兵源充足。

相反，CF格蘭納達今季退步唔少，鋒力又疲弱，今仗更有施古爾拉、美恩斯、謝美羅美路因傷倦勤，無力抵擋意欲爭標嘅馬體會狂轟猛炸，客勝有1.65倍咪錯過。