C朗又扭計 皇馬冇鑊氣

猪拉多纳

今個禮拜跟咗香港隊去馬來西亞，當地電視台有西甲比賽精華，令大家多咗個話題，當我哋以為皇馬會失分，教練莫連奴用年輕球員波拉特入替奧斯爾，最後憑佢入波致勝，大家對莫帥當然讚不絕口。講番聽朝皇馬主場迎戰畢爾包，由於下周中有歐聯，C朗又突然扭計話可能離隊，兼且馬會「讓球主客和」開2球，所以大膽推介2.55倍「讓客」。（now632台周日清晨5:00直播）
讓唔起畢爾包兩粒

隨住艾比路亞同法比奧干查奧復出，令莫連奴有充裕人腳調動，應付雙線作戰。現時皇馬喺聯賽落後巴塞8分，已冇失分空間，相信會吩咐球員盡力爭勝，但皇馬國腳如雲，球員剛啱出席完國際賽，跟手又要打歐聯，聽朝就算盡力都未必得心應手，加上希古恩倦勤，賓施馬好番未必有態，莫帥前線選擇唔係好多。

畢爾包上季表現令人眼前一亮，可惜季初有洛蘭迪扭計唔續約，結果要長坐冷板，加上查維馬天尼斯離隊，缺少兩名大將，戰鬥力受影響搞到表現嚴重走樣，直至近期至開始回復水準，始終馬高蘇沙亞達、蒙尼恩等年輕球員潛質優厚，日後有能力喺國家隊上位，特別係馬高蘇沙亞達，周中為西班牙國家隊比賽取得入球，呢個係張峰相信畢爾包作客巴拿貝入到波嘅原因，睇怕皇馬要淨贏三粒唔容易。
下季返曼聯？

至於上場聯賽撞到左眼附近位置標晒血嘅C朗，可能又想扭計加人工，佢話覺得皇馬同佢續約「唔夠積極」，而且高層對佢同莫連奴都冇足夠支持，《體育報》、《阿斯報》尋晚都話C朗親口承認正「認真考慮」今季結束後離隊可能性，或者會重返曼聯，同時聖日耳門都係潛在買家，軍心受損捧唔過喎！

張峰來料：畢爾包（讓球客勝）