南韓冇心踢袋鼠兵得「細」

猪拉多纳

呢個周中嘅國際友賽都幾無聊，唔少球隊根本唔齊人，好多球星都突然「傷咗」，尤其南韓喺華城主場對澳洲場友誼波，兩邊都擺明車馬試新人，賽果真係任佢開，呢啲波都係玩吓個1.54倍入球細算喇。（開賽時間：周三晚6:00）
澳洲選兵有誠意

「太極虎」早輪公布今場波嘅名單，即刻畀人一種感覺─場波可能要送叉燒飯至有人肯睇，因為18個人入面，至出名係李東國、李根鎬同龍門鄭成龍，其他香港球迷可能有啲印象嘅，大概就係金信旭同朴鍾佑，朴鍾佑係乜水？咪係響倫奧足球季軍戰舉起獨島紙牌，搞出一個大頭佛嗰位囉！外流嘅朴主永、具滋哲等等一個都唔見，講好聽啲係試用新人，難聽啲就係湊夠腳應酬90分鐘就算。

比較起嚟，澳洲出嘅人仲算似樣啲，雖然中鋒約舒亞堅尼地剛啱做完背骨手術唔使預佢，但係呢個「高人」摺埋咗一段日子，對隊波冇乜影響，而且「袋鼠兵團」起碼仲有緬恩斯件路卡維斯亞、近況幾Fit嘅射手艾奇湯臣、後衞史柏拉洛域呢啲主力球星，論誠意睇嚟就仲好過南韓添嘞。

雖然韓、澳近6次交鋒，大細開出比率都係5成，但係今場波實在太冇意義嘞，大家只係當一場練習賽咁玩，啲球員過兩日返去球會又有波打，點會「為國捐軀」呀！都係博佢開細算喇！