新星對決 德軍吔橙

猪拉多纳

荷蘭遇剋星讓唔起

今個國際賽期嘅其中一場焦點大戰，當然係荷蘭對德國嘅熱身賽，雖然話換上新帥新兵嘅「橙衣軍團」喺世界盃外圍賽4戰全勝，氣勢好似夠晒勁，但面對同樣注入新血嘅剋星「日耳曼軍團」就未必有啖好食，呢場世仇新星對決，德國1.96倍平手盤當然值得捧場啦！（now100及632台、廣東體育周四凌晨3:30直播）

德國隊由「拜仁幫」獨大嘅問題一直都為人詬病，不過今場賽前有舒韋恩史迪加、卻奧斯及謝路美保定3個拜仁兵因傷病退隊，加埋高路斯、奧斯爾同舒姆沙等主力同樣有傷踢唔到，實行畀晒機會領隊勒夫換新血試陣啦！獲補選嘅就包括22歲仔嘅法蘭克福右閘施巴斯坦真格，施雲賓達亦得以隨孖生兄弟拿斯賓達再次入選大國腳，難得有機會孭飛當然全力搏殺，唔似得班大球星咁錫身，再出現上場對瑞典入4球被追平嘅慘況啦！
德國主力傷晒新仔試陣

不過講到德國最搶眼新星始終要數馬高列奧斯，呢位23歲後生仔今季過檔多蒙特後，上陣16次已取得8個入球及4次助攻，當中仲有唔少係金球，連荷蘭名宿古列治都點名大讚佢嘅級數僅次於C朗同美斯，係德國現今最有才華嘅球員！加上首次入選嘅紐斯泰達同埋喺「蜜蜂兵團」愈踢愈醒神嘅根度簡都不過係20出頭，呢個年輕陣容真係令小妹非常期待o架！
尹佩斯缺陣洛賓認低威

荷蘭經過歐國盃分組賽全敗出局後，就換上尹戈爾領軍，4場世盃外圍賽更錄得全勝。不過睇番往績，佢哋近4次硬撼德國都贏唔到，今場更有最叻單天保至尊嘅尹佩斯唔踢得，對「荷蘭橙」嘅打擊絕對唔細，連洛賓都話：「我哋啱啱換晒新球員同新領隊，發展完善嘅德國起碼高我哋兩個Level啦！」係咪客套說話都好，小妹都認同荷蘭自歐國盃後正進入「重建」階段，今場換帥後首次面對真正勁旅，輸波就當交下學費啦！
兩隊交手旺開大

‧德國近8場賽事都至少出現3個入球，亦只有1場冇失波。

‧荷蘭近7場賽事有6場出現3個或以上入波。

‧兩軍近6次對賽，有5次開出入球大，荷蘭近4次都未能獲勝。