C朗博洗底 皇馬舔晒「利」

猪拉多纳

今晚「銀河艦隊」空降剋星利雲特，「皇馬大佬」C朗近排積極靠廣告加新聞「洗底」，盡最後努力爭取金球獎殊榮，以皇馬近3場聯賽喪入11球兼冇失過波嘅勇態，一於捧1.65倍「讓客」啦！

（now632台周一凌晨4:30直播）
巴塞食慣馬略卡 美斯開Party

每位成功人士唔多唔少都有啲完美主義，C朗最新嘅代言廣告就係硬Sell佢努力追求十全十美嘅形象，就算小妹不嬲對佢好感唔大，都覺得幾感動o架！佢早排認衰話因為形象差先難以同美斯爭金球獎，家陣有心「洗底」爭做「一哥」，小妹就睇好近6場聯賽勁入9球嘅佢，會比之前踢得更落力，皇馬今場要打破近3季作客利雲特不勝嘅宿命，繼續追趕死敵巴塞唔係難事。

皇馬今仗雖有射手希古恩同賓施馬打柴，但頂上嘅荷西卡利祖上仗對多蒙特表現唔差。反觀利雲特剛喺歐霸盃惡鬥完川迪，比皇馬更少休息時間，疲兵應戰好難頂得住C朗等球星。至於榜首巴塞今晚作客連敗嘅馬略卡，佢哋近3次造訪呢支頹兵全勝兼冇失波，睇怕都係美斯入波開Party獻畀囝囝Thiago居多。

（now632台周一凌晨0:50直播）