碧基復出救「矮仔」巴塞

猪拉多纳

上季馬略卡教練卡柏路斯剛上任時球隊表現唔錯，到今季最初幾場比賽亦演出標青，點知最近大跌Watt連輸5場，距離降班區域只差2分，成為近20年最差走勢。傷兵滿營係佢哋一蹶不振嘅原因之一，上周杜斯山度士勇戰受傷加入十字軍行列，今晚無緣倒戈巴塞，加埋原本已經有傷嘅阿拿裏紐尼斯、查維亞馬古斯、祖奧域陀、安東尼奧盧比斯同年輕球員烏真華，同埋喺盃賽打柴嘅施莫拿華路，馬略卡惟有靠射手希美特同域陀攻堅。

巴塞歐聯分組賽落敗，係近3年嚟嘅第一次。佢哋上周西甲贏波後打破球會史上最佳開季紀錄，令愈來愈多人覺得維蘭路華比哥迪奧拿更出色。不過佢哋防守不濟嘅毛病始終存在，作客些路迪後防高度更加係「無得頂」輸晒，4名後防只有1人身高過1米8，面對高Q大棍之流，死穴盡露。好彩西甲屬「技術派」唔係以長傳急攻為主，而且今仗中堅碧基、佩奧爾或能復出，高空波嘅劣勢有望改善。巴塞近10次作客馬略卡贏足9次，美斯近4次碰頭皆有士哥，受咗傷嘅獅子睇怕係時候搵人出氣。

（now632台周一凌晨0:50直播）