喜鵲W快扑「錘」

猪拉多纳

丹巴巴亞抖夠復出搏殺

上星期小妹去咗泰國旅行，一落機就已經進入忘我境界，幾乎日日都係吃喝玩樂，對住陽光與海灘，玩到直頭嗰日係禮拜幾都唔知。雖然係咁，小妹都仲記得做功課，就係特登落酒吧同友人一邊飲番杯，一邊睇利物浦對紐卡素嘅賽事。其實「喜鵲」嗰場作客一啲都唔失禮o架，好可惜最後被利物浦逼和，搞到3分變1分。難得今晚又有得睇，小妹當然身體力行，精神同金錢上都支持紐卡素贏波，主勝1.85倍咁好分，唔買等幾時﹖
韋斯咸作客腳軟

今晚在聖占士公園上演嘅英超大戰，將成為紐卡素與韋斯咸嘅「駁火」戰場！雖然紐卡素剛啱周中喺歐霸盃先逼和比利時球隊布魯日，但要記住嗰場佢哋只係用二線兵，正如領隊柏杜話齋，因成班主力喺歐霸盃都休息無落場，所以今晚英超主場出擊鬥韋斯咸，體力絕對唔成問題，個個都餓波，加上佢哋近況大勇，英超連歐霸盃加埋近8場只輸過1場，今晚對住作客例牌腳軟嘅韋斯咸，當然睇高一線，一於捧喜鵲「大炒」一場。

「喜鵲」除咗射手丹巴巴亞獨取7球外，其他中前場主將如卡比耶，賓艾化同柏比斯施斯等亦有「士哥」，雖然中堅高洛仙尼要坐波監，好彩仲有狀態回勇嘅告魯爾把關，人腳都算幾齊，只要前線好好把握，3分可以話袋硬。相反「錘仔幫」近況有所下滑，上次作客仲輸埋畀韋根。正所謂久守必失，今晚仲要對住主場特別醒神嘅紐卡素，睇嚟都係凶多吉少。
微博傳情：浪「曼」晚餐

上星期去咗泰國，但今次係去芭堤雅同曼谷，仲去咗我想去好耐嘅地方，就係《醉爆伴郎團２》拍攝場地之一嘅空中露天餐廳。嗰度有成64樓高，望到晒成個曼谷夜景，一上到去已經忍唔住大叫咗聲「Amazing!」喺咁嘅地方食晚飯真係好浪漫呀！
推介：紐卡素（勝）