利物浦受讓好路

猪拉多纳

哨牙蘇弗爆 當車仔冇到

英超今晚大戰連場，上星期失落榜首位置嘅車路士，將會喺史丹福橋球場迎戰利物浦。雖然積分榜上兩軍有一大段距離，不過車仔近期狀態回落，相反利物浦就有蘇亞雷斯着晒火，帶起成隊波嘅士氣，乘勇配合往績優勢，紅軍今鋪作客仍有力搶分，受讓一球嘅1.9倍「讓球客勝」，值得支持！

（有線200及300、廣東體育周一凌晨0:00直播）

阿占今季講過唔止一次，車路士條防線真係有好多問題，季初只係靠超強入球能力頂住，大家先唔多覺啫！隨住夏薩特同奧斯卡杜斯山度士蜜月期已過，呢班波嘅狀態開始慢慢回落，近兩場聯賽對曼聯同史雲斯，加埋只得1分落袋！睇番車路士自9月中對史篤城後，就從未試過喺聯賽保持清白身，小弟真係諗極都唔明，點解迪馬堤奧肯放走艾辛？

講真，車仔幾位大將都係攻擊型指揮官，家陣只得番約翰米基爾同拉美利斯做第一道屏障，需知道呢兩位防守中場後上入波就叻，攔截反而唔多夠硬淨，面對中下游球隊尚且過到骨，一對住勁旅就即刻現形，點靠得住呀？
紅軍近6次鍊車贏5鋪

係，對家利物浦開季嚴重走樣，蘇亞雷斯更成為英超公敵，但依家阿占真係要講句「神又係你、鬼又係你」喇！事關呢位烏拉圭射手弗到漏，入波助攻瓣瓣有，雖然足球唔係一個人踢晒，但蘇亞雷斯的的確確係獨力撐起成隊紅軍。

或者因為受到鼓舞啦，利物浦近期回復生氣，經歷頭5場聯賽不勝後，近5場英超已取得2勝3和不敗佳績，咪忘記紅軍近6次鍊車贏咗5次，受讓當然要撐得過啦！當然，尾場固然精彩，但頭場曼城鬥熱刺亦係一場不可多得嘅大戰，而且仲有3D直播添，大家記住預備好副立體眼鏡喇！
藍紅對賽旺開大

‧費托自加盟車路士後，3次對利物浦上陣都輸波。

‧車路士近6次於主場出戰利物浦，僅得1次獲勝，其餘5仗得1和4負。

‧兩軍近3次交手，有3次開出入球大。

‧利物浦近5場英超賽事取得2勝3和入9粒，當中射手蘇亞雷斯個人包辦5個入球。

‧連歐聯及聯賽盃加時在內，車路士近5戰只得2勝1和，防線更勁失12球。
頂占筍盤：利物浦（讓球客勝）