蔚山「老虎」狂噬吉達艾阿里

猪拉多纳

亞冠盃決賽今晚由韓職蔚山現代喺主場蔚山文殊足球競技場迎戰嚟自沙特嘅吉達艾阿里，外號「老虎」嘅主隊之前連贏8場嚟到終極戰，對住一直係跌跌撞撞過關，兼有防守重心艾哈比停賽嘅客軍，要贏波仲有幾難？1.68倍主W點走得甩？

（now670台周六晚6:30直播）

翻查歷史，南韓合共9次贏得亞冠盃係最成功國家，加上近6屆賽事有4支韓職球隊入決賽，當中3支捧盃，蔚山今次殺入決賽，心理上肯定贏晒。而且佢哋有望成為首支喺自己地頭捧盃嘅韓職球隊，以及造出賽事紀錄嘅9連勝，你話佢哋點會唔搏命先？
實力超班火力驚人

事實上，「老虎」喺晉級過程先後淘汰日職冠軍柏雷素爾同澳職冠軍布里斯班獅吼，就連作客沙特勁旅希拉爾都可以贏4:0，早已證明超班實力。再者，佢哋嘅進攻三劍俠巴西前鋒拉芬夏、土炮中鋒金信旭及李根鎬默契一流，前兩者喺淘汰賽階段仲各入4粒，火力唔講得笑。

16強都只係靠互射12碼先贏到艾查捷拉嘅吉達艾阿里，去到4強戰又只係喺次回合最後階段先入波晉級，根本冇乜優勢o架。首席前鋒巴西嘅域陀奧利華拉今屆入咗7球唔嘢小，衰在佢踢過全南天龍，同過蔚山中堅郭泰輝做隊友，「輝哥」講到明會睇實佢隻黃金左腳，睇怕惡唔出樣。加埋正選左閘艾哈比停賽，中場查薩維有傷，梗係捧唔過啦！
亞冠盃賽制

亞冠盃決賽以一場定勝負，若兩隊於法定時間打和就要加時，再和就要互射12碼。