巴斯蒂亞主場「大」放送

猪拉多纳

今晚五場法甲，波童推介巴斯蒂亞主場鬥華倫西恩斯入球大。巴斯蒂亞係今季法甲大盤王，華倫西恩斯則係聯賽入球王，兩軍相遇相信入球一定唔會少。

（周日凌晨3時開賽）

巴斯蒂亞今季踢咗十一場聯賽有十場開大，比率達九成，呢隊波踢法開放，無論主場、作客都將防線推得好前，所以目前失球數字亦係全法甲之冠，不過佢哋攻力亦唔錯，近五場聯賽攻入十球，當中兩場主場都能射入三球，進攻效率奇高。

華倫西恩斯上周末主場大勝索察三比一，聯賽十一戰入二十三球，係目前入波最多球隊。除首席射手勒泰歷之外，佩祖爾上場梅開二度狀態亦佳，再配合一眾後上中場丹歷、卡迪亞及山齊士摩蘭奴，進攻點多令對手難於防範，大盤有1.68倍非常抵玩。
里爾炒起比斯特

至於直播賽事里爾主場鬥比斯特，比斯特主場、作客好似兩隊波，今季五場主場有四勝一和佳績，作客則六戰全敗。里爾周中歐聯遭逢大敗，知恥近乎勇返主場隨時反彈，一於捧1.85倍「讓球主勝」。

（now 714周日凌晨零時直播）